नबिल बैंकको ३ अर्ब रुपैयाँबराबरको ऋणपत्रमा आजबाट आवेदन दिन सकिने
काठमाण्डौ । नबिल बैंक लिमिटेडले आज(साउन १० गते)देखि ३ अर्ब रुपैयाँबराबरको ऋणपत्र निष्कासन गरेको छ ।
बैंकले १ हजार रुपैयाँ अंकित दरका कुल ३० लाख कित्ता भएको ७ वर्षे अवधिको ‘८ % नबिल डिबेन्चर २०८५’ नामक ऋणपत्र निष्कासन गरेको हो ।
यो ऋणपत्रको ३० लाख कित्तामध्ये १८ लाख कित्ता ऋणपत्रले हुन आउने कूल १ अर्ब ८० करोड रुपैयाँ ऋणपूँजी रकम व्यक्तिगत तवरबाट बिक्री गरिनेछ भने १२ लाख कित्ता ऋणपत्रले हुन आउने कूल १ अर्ब २० करोड ऋणपूँजी रकम(सोमध्ये ५% अर्थात ६०,००० कित्ता ऋणपत्र सामुहिक लगानी कोषका लागि छुट्टयाएको समेत) सर्वसाधारणका लागि सार्वजनिक निश्कासनबाट बिक्री खुला गरिएको छ ।
यो ऋणपत्रमा सि–आस्बा सेवामा सहभागी बैंक तथा वित्तीय संस्थाहरु र तिनका शाखा कार्यालयहरुबाट आवेदन दिन सकिनेछ। यो ऋणपत्रको निष्कासन बन्द छिटोमा साउन १३ गते र ढिलोमा साउन २४ गते बैंकिङ समयपछि हुनेछ।
इच्छुक लगानीकर्ताले न्यूनतम २५ इकाइ र अधिकतममा सम्पूर्ण इकाइका लागि आवेदन दिन सक्नेछन् ।
यो ऋणपत्रमा लगानी गरेबापत लगानीकर्ताले वार्षिक ८ प्रतिशत ब्याज प्राप्त गर्नेछन् ।
बैंकको धितोपत्र बिक्री प्रबन्धकमा एनआइबिएल हिमालयन क्यापिटल लिमिटेड रहेको छ । नबिल बैंकले गत जेठ ११ गते नेपाल धितोपत्र बोर्डबाट ऋणपत्र निष्कासनका लागि अनुमति प्राप्त गरेको थियो ।
