नेपाल हाइड्रो डेभलपरद्वारा लाभांस प्रस्ताव
काठमाण्डौ । नेपाल हाइड्रो डेभलपर लिमिटेडले लाभांस वितरणको प्रस्ताव गरेको छ । कम्पनीको फागुन २० गते बसेको सञ्चालक समितिको बैठकले गत आर्थिक वर्षका लागि लाभांस वितरणको प्रस्ताव गरेको हो ।
बैठकले आर्थिक वर्ष २०७६/७७ सम्मको सञ्चित मुनाफाबाट १५ प्रतिशत बोनस सेयर र ०.७८९५ प्रतिशत नगद लाभांस गरी कुल १५.७८९५ प्रतिशत लाभांस वितरणको प्रस्ताव गरेको हो । कम्पनीद्वारा प्रस्तावित लाभांसमा हाल कायम चुक्तापूँजी २६ करोड रुपैयाँको १५ प्रतिशतले हुन आउने ३ करोड ९० लाख रुपैयाँ बराबरको बोनस सेयर र ०.७८९५ प्रतिशतले हुन आउने २० लाख ५२ हजार ६३२ रुपैयाँ बराबरको नगद लाभांस(कर प्रयोजनका लागि) रहेका छन् ।
कम्पनीले आ.व २०७४/७५ का लागि प्रस्ताव गरेको ४ प्रतिशत बोनस सेयर समेत आ.व २०७६/७७ का लागि प्रस्ताव गरिएको १५ प्रतिशत बोनस सेयरमा समावेश गरिएको जानकारी दिएको छ ।
यो लाभांस कम्पनीको आउँदो चैत १७ गते आयोजना हुने वार्षिक साधारण सभाबाट पारित गरिनेछ । कम्पनीले आउँदो चैत १७ गते १२ औँ, १३ औँ र १४ औँ वार्षिक साधारण सभा एकैपटक डाकेको छ ।
लाभांस वितरण तथा साधारण सभा प्रयोजनका लागि कम्पनीले चैत ०३ गतेदेखि १७ गतेसम्म बुक क्लोज गर्ने निर्णय गरेको छ ।
