शिखर इन्स्योरेन्सद्वारा लाभांस वितरणको प्रस्ताव
काठमाण्डौ । शिखर इन्स्योरेन्स कम्पनी लिमिटेडले लाभांस वितरणको प्रस्ताव गरेको छ। कम्पनीको पुस २० गते बसेको सञ्चालक समितिको बैठकले गत आर्थिक वर्षका लागि लाभांस वितरणको प्रस्ताव गरेको हो।
बैठकले आ.व २०७६/७७ को वितरणयोग्य मुनाफाबाट चुक्तापूँजीको ३६.१ प्रतिशत बोनस सेयर र १.९ प्रतिशत नगद लाभांस गरी कुल ३८ प्रतिशत लाभांस वितरणको प्रस्ताव गरेको हो। प्रस्तावित लाभांसमा चुक्तापूँजी १ अर्ब ५ करोड ७३ लाख १० हजार ६ सय रुपैयाँको ३६.१ प्रतिशतले हुन आउने ३८ करोड १६ लाख ८९ हजार १२७ रुपैयाँ बराबरको बोनस सेयर र १.९ प्रतिशतले हुन आउने २ करोड ८८ हजार ९०१ रुपैयाँ बराबरको नगद लाभांस(कर प्रयोजनका लागि) रहेका छन्।
कम्पनीले आ.व २०७७/७८ मा हकप्रद सेयर जारी गरी चुक्तापूँजी १ अर्ब ३७ करोड ४५ लाख ३ हजार ८ सय रुपैयाँ पुर्याएको हुँदा हकप्रदलाई समेत समायोजन गर्दा उल्लेखित लाभांस दर चुक्तापूँजी १ अर्ब ३७ करोड ४५ लाख ३ हजार ८ सय रुपैयाँको २७.७६९ प्रतिशत बोनस सेयर र १.४६२ प्रतिशत नगद लाभांस गरी कुल २९.२३१ प्रतिशत लाभांस वितरणको प्रस्ताव गरिएको कम्पनीले जनाएको छ।
यो लाभांस बीमा समितिबाट स्वीकृत भएपछि कम्पनीको आगामी वार्षिक साधारण सभाबाट पारित गरी वितरण गरिनेछ।
