राष्ट्रिय बीमा कम्पनीको मुनाफा ४९.४७%ले घट्यो, अन्य सूचकको अवस्था कस्तो ?

काठमाण्डौ । राष्ट्रिय बीमा कम्पनी लिमिटेड चालु आर्थिक वर्षको तेस्रो त्रैमाससम्ममा १९ करोड ३७ लाख २१ हजार रुपैयाँ खुद बिमाशुल्क आर्जन गरेको छ। यो रकम अघिल्लो वर्षको सोही अवधिको तुलनामा १०.८५ प्रतिशतले बढी हो। अघिल्लो वर्ष कम्पनीको खुद बीमाशुल्क आर्जन १७ करोड ४७ लाख ५९ हजार रुपैयाँ थियो। 

समीक्षा अवधिमा कम्पनीले लगानी कर्जा तथा अन्यबाट हुने आय बापत १० करोड ५५ लाख ५६ हजार रुपैयाँ आर्जन गरेको छ। जुन रकम गत वर्षको सोही अवधिको तुलनामा ३८.८० प्रतिशतले कम हो। अघिल्लो वर्षको सोही अवधिमा यो रकम १७ करोड २४ लाख ९० हजार रुपैयाँ थियो। 
त्यस्तै समीक्षा अवधिमा कम्पनीले ३ करोड ४३ लाख ९४ हजार रुपैयाँ खुद दाबी भुक्तानी गरेको छ। अघिल्लो वर्षको सोही अवधिमा यो रकम ५ करोड ८ लाख ७ हजार रुपैयाँ थियो। यसरी हेर्दा अघिल्लो वर्षको तुलनामा कम्पनीले ३२.३० प्रतिशत कम खुद दाबी भुक्तानी गरेको छ। 

यो अवधिमा कम्पनीको खुद मुनाफा घटेको छ। तेस्रो त्रैमासको अन्त्यसम्ममा कम्पनीको खुद मुनाफा २७ करोड १२ हजार रुपैयाँमा सीमित भएको छ। यो रकम अघिल्लो वर्षको सोही अवधिकोभन्दा ४९.४७ प्रतिशतले कम हो। अघिल्लो वर्ष कम्पनीले ५३ करोड ४३ लाख ९० हजार रुपैयाँ खुद नाफा आर्जन गरेको थियो। 

त्यस्तै समीक्षा अवधिमा कम्पनीको बीमा कोषको आकार बढेर २ अर्ब ३८ करोड ५० लाख २२ हजार रुपैयाँ भएको छ। यो आकार अघिल्लो वर्ष २ अर्ब १९ करोड ७९ लाख २८ हजार रुपैयाँको थियो । कम्पनीको जगेडा तथा कोषको आकार बढेर ३ अर्ब १० करोड ३३ लाख ५३ हजार रुपैयाँको उचाईमा पुुगेको छ । अघिल्लो वर्ष यो कोषको आकार २ अर्ब ९१ करोड ६२ लाख ५९ हजार रुपैयाँमा सीमित थियो । 

अघिल्लो आर्थिक वर्षको तेस्रो त्रैमाससम्ममा १० हजार ६३२ बीमालेख जारी गरेको कम्पनीले समीक्षा अवधिको वर्षसम्ममा ३९ हजार ६२८ बीमालेख जारी गरेको छ। 

यस्तै कम्पनीको प्रतिसेयर आम्दानी १३५.०२ रुपैयाँ, मूल्य आम्दानी अनुपात १७७.८५, तरलता अनुपात ३.३२, प्रतिसेयर नेटवर्थ १२६३.८८ रुपैयाँ र प्रति सेयर कुल सम्पत्तिको मूल्य २१५८.३५ रुपैयाँ रहेको छ।